Tacloban City (March 13, 2023)– Ha sulod hin usa ngada hin duha ka semana, ginlalauman nga magigin operational na an mga linya han tubig nga madalagan tikang han dako nga water reservoir ha Brgy. 39 Calvary Hill ngadto ha Norte Tacloban ngan iba pa nga dapit han siyudad.

Ini in sumala kan LMWD General Manager Ronnie “ Nono” Cornico kahuman umabot na an ira gin pipinamulat nga Controller nga gagamiton ha pag control ug pag batagbatag (distribute) han tubig tikang hini nga dako nga water reservoir.

Sumala kan Cornico, maiha na nga tapos an paglatag han mga tubo tikang ha Calvary Hill tubtub ha kataposan nga barangay ha Norte- an Brgy. Tagpuro, sanglit yana nga umabot na ini nga duro hin ka importante nga Controller, maitataud na ini ngan makaka padalagan na han tubig pa Norte Tacloban komo kadugangan ngan mas makusog nga supply han tubig.

Iginsumat pa ni Gen. Manager Cornico nga may-ada nagpapadayon nga pagplantsa hiton plano hin “water highway” tikang han surok ha Pastrana Leyte deretso ha siyudad han Tacloban.

Tatawagon ini nga Water Highway han Tacloban kay an dagko nga mga tubo nga iglilinya tikang han water source ha Pastrana Leyte in waray connection ngadto han mga aagian nga mga bungto kundi deretso gudla ha Tacloban, pagklaro pa ni Cornico.

mmp/CIO

jballo/CIO