Tacloban City – Kada gab-i nala iton pagkokolekta han mga basura ha downtown nga dapit han siyudad.

Ha pamakiana kan Mr. Paterno “Jun” Mationg, Jr., osa han mga in-charge han solid waste management han Tacloban City Environment and Natural Resources Office (ENRO), an pangolekta han basura in nagtitikang alas 8:00 – tubtob alas 11:00 han gab-i. An mga basura nga ig gagawas ha kalsada lapos han alas 11:00 in diri na pagkokolektahon.

An mga lugar nga pag kokolektahan han mga basura hini nga talaan, in tikang ha mga barangay ha Boy Scout Junction (mas kilala nga Coca-Cola Junction), deretso ha downtown area, ngan ngadto ha Young Field nga dapit.

Dida hini, mahugot nga igin-aaghat an tama nga waste segregation o an pagburublag han maduronot, diri maduronot, ngan mga recyclable materials.

An mga maduronot, pag kokolektahon kada Lunes, Miyerkules ngan Biyernes; an mga diri maduronot- kada Martes, Huwebes ngan Sabado, samtang Dominggo liwat an para han mga recyclable.

Siring ni Mationg, ginsugad ini nga gab-i nala an pagkokolekta han mga basura ha downtown kay para diri na mababalaong an trapiko ha adlaw.

Dugang pa ni Mationg, an mga garbage collectors liwat naduroy kamaiha an pagkolekta kay ginlalain-lain pa an maibaraligya ngan han diri maibaraligya nga basura-sanglit nadugang pag trapik kun adlaw an collection.

Ha luyo nga bahin, igin sumat ni Mationg nga pilot area yana han City ENRO an Area 3 para han waste segregation diin an mga maduronot nga basura in ira gintitirok para himoon nga abono nga ibabalik liwat paghatag ngadto han mga nagkikinahanglan nga may umhanan o garden ha natad o libong man.

An mga lugar nga sakop han Area 3, amo an Brgy.79 Ugsad, Marasbaras, Brgy. 81, Marasbaras, Brgy.82, Marasbaras, Brgy.83, Paraiso, San Jose, Brgy. 83-A Burayan, San Jose, 83-B Cogon, San Jose, Brgy. 83-C Taguictic, San Jose, Brgy. 85 San Jose, Brgy. 86, San Jose, Brgy. 87, San Jose, Brgy. 88, San Jose, Brgy. 89, Baybay San Jose, ngan Brgy. 90, Baybay San Jose.

mmp/CIO