Para paghatag hin kadugangan nga panahon ngadto han mga business operators nga makapagrenew nga waray penalidad, gin-pirmahan ni Mayor Alfred Romualdez an ordinansa nga ginaprubaran han Sangguniang Panglungsod nga nagpapahilawig han renewal period ngadto ha February 3, 2023.

Dara han malain nga panahon nga naging kawsa han pagsuspende han trabaho, ginrekomenda han alkalde nga magka may-ada duha ka semana nga extension para makagproseso ngan makag-apply an mga negosyante nga waray pag-aatubangon nga penalidad ngan interes.

Sumala kan Gemafiel Gaspay, tagmangulo han Business Permit and Licensing Division (BPLD) abri an ira buhatan ha Business One-Stop Shop (BOSS) kutob 7:00 p.m. kada Lunes ngada Biyernes ngan kutob naman 5:00 p.m. han Sabado.

Samtang, abri naman an tulo nga satellite offices (Robinsons Marasbaras, Robinsons North ngan Gaisano Real) tikang 9:00 a.m ngadto 5:00 p.m.

Para naman han mga negosyante nga gusto mag renew online, may-ada e-payment system han City Government

https://businessportal.tacloban.gov.ph diin pwede mag process ngan magbayad pinaagi ha GCash, PayMaya ngan Land Bank.

Ha pagkayana, sobra na 50% an ihap han dokumento nga naproseso han City government tikang ha 7,956 nga registered businesses ngan 2,887 naman ha transportasyon nga pan-negosyohan. | via C.Merin/CIO

#CIOUpdates

#businessrenewal

#TaclobanCity

Pubmat via D.Ortega/CIO