Bug-os na nga Rehiyon 8 iton pagtatagdon yana ni Mayor Alfred S. Romualdez komo mangulo han Regional Peace and Order Council (RPOC).

Dida han Marso 15, pormal nga nanumpa haiya katungdanan hi Romualdez ha atubangan ni DILG RegionaL Director Arnel Agabe kahuman hiya tagan hin gahum ni Presidente Ferdinand “Bongbong” Romualdez Marcos, Jr. agud pangulohan an RPOC.

Sumala kan Romualdez, komo Mayor han Tacloban diri liwat niya pababay-an an siyudad ha himangrawon han kamurayaw kay an Tacloban an sentro han bug-os nga Rehiyon 8.

Nakaduha na hira mag meeting, siring ni Romualdez, ngan yana nga maabot Marso 27 aadto ha Manila an ira ikatulo nga meeting kun diin ilalatag an mga impormasyon hiton kahimtang han Peace and Order han rehiyon.

An tiarabot nga Barangay elections, problema ha nga illegal droga, insurhensiya ngan illegal gambling in kaupod han mga paghihirohimangrawan panahon hini nga iya pamunuan ha RPOC.

Sumala kan Romualdez, kinahanglan pag-andaman hin maupay an pagdumara han Peace and Order subay han mga kinakaptan nga mga impormasyon han kada ahensiya han gobyerno agud mahimo an kaangayan nga pitad ngan mabaton an mga araba han publiko nga may kalabutan han kamurayawan.

Nakatalaan nga bisitahon ni RPOC Chairperson Romualdez an unom (6) nga probinsiya han Region 8 agud personal igkahimangraw an mga opisyales hini nga mga lugar.

mmp/CIO