Pabahay ha Tacloban hihimoon nga modelo ha Marawi City, Mindanao

Pabahay ha Tacloban hihimoon nga modelo ha Marawi City, Mindanao

Pabahay ha Tacloban hihimoon nga modelo ha Marawi City, Mindanao

No Comments on Pabahay ha Tacloban hihimoon nga modelo ha Marawi City, Mindanao

Hihimoon nga modelo han Ministry of Human Settlement ha ilarom han Bangsamoro Autonomous Region in Muslim Mindanao (BARMM) an mga sestema han mga pabahay ha siyudad han Tacloban.

Ini an panuyo han pagbisita ha Tacloban City han mga opisyales tikang ha BARMM yana nga semana, (Sept. 21-24) nga ginmangulohan nira Minister Hamid A. Barra, Ministry of Human Settlement and Development- BARMM (naka dulaw hin bado) ngan (may kalo) Director Esmail W. Ebrahim, Director General, Ministry of Human Settlement and Development (MHSD).

Una nga ginbisita an Villa Diana pabahay ha New Kawayan, North Hill Arbours, Lions, GMA Kapuso Village ngan UN Habitat. Kaupod ni Mrs. Ruth Ramirez, incharge han North City Hall Extension, dida hini nga paglibot han mga taga MHSD an mga taga NHA, Catholic Relief Service (CRS), ngan Tacloban City Housing and Development Office.

An mga bisita tikang ha BARMM in namakiana gihapon kun ano an mga livelihood components/programs dida han mga pabahay ha luyo nga mga survivors ini han kalamidad. Ngatanan ini nabaton han City Government, nga magigin inspirasyon yana nira didto ha ira paghihimoon nga housing projects ha Marawi City.

Ha pamakiana kan Minister Hamid A. Barra, siring niya maghihimo liwat hira hin mga pabahay didto ha Marawi City kun diin an ira mga nahibaroan nga ideya ha Tacloban City an ira magigin giya haira pagpatuman hin mga pabahay ha Marawi City kasugbong an CRS ngan iba pa nga mabulig didto haira siyudad.

Mahinunumduman nga dida han Mayo 23, 2017 bumutho an gyera ha butnga han mga terrorista nga ISIS ngan han mga sundalo han gobyerno nga humagos hin lima (5) ka bolan- ngan nag resulta ini han karuba han bug-os nga siyudad diin puros rusdak an mga balay ngan mga commercial buildings.

Samtang an Tacloban City, an pinaka naapektuhan han Super Typhoon Yolanda dida han Nobyembre 08, 2013.

Nahimumutang nga an duha nga siyudad, Marawi ngan Tacloban, nga mga biktima hin manmade ngan natural calamity in yana magka agbay ha pagduso hin development para han mga didto ha Marawi City ha Mindanao.

Buwas, Septyembre 23,nakatalaan liwat an harampang nira Minister Barra ngan Mayor Alfred S. Romualdez para hin dugang nga paghirohimangraw.

M. Padernos/CIO

About the author:

Leave a comment

Back to Top