Nagpapadayon an panrehistro han national ID ilarum han Philippine Identification System (PhilSys), nga nagtikang dida pa han tuig 2021, pero ha pagkayana ginpahilawig ine ngan nag-uupod na han mga eskwela nga nag-eedad singko anyos paigbaw.

Sumala kan Sheryl Ann A. Jamisola, Chief Statistical Specialist han Philippine Statistics Authority ha pamakiana han City Information Office nga naarangkada na an panrehistro ha PhilSys ngan delivery han ePhilID in printed form nga puede gihapon ig-save ha anoman nga mobile device. Ini nga ePhilID in mayda pareho nga functionality han PhilID (Physical Card) nga kun diin an Philippine Postal Corporation an responsable ha delivery ngadto ha mga registrants. An natagan han ePhilID in makakakarawat gihapon han PhilID ha maabot nga adlaw.

Ginbubuhat an panrehistro ha mga eskwelahan kaupod an panlista han mga waray pa narehistro an birth ha pakipag sumpayan han Department of Education, siring ni Jamisola.

Samtang ginsumat gihapon han opisyal nga as of March 15, 2023, aada na ha 86.6% an nagparehistro han PhilSys ha Tacloban City, Ngan 32,399 an na-issuehan hin ePhilID nga gin dedeliver han mga Philsys Registration Personnel.

Kasumpay naman hine, dire na kinahanglan mag-pa-appointment adton mayda na national ID o ePhilID nga makuha han ira Live Birth, Marriage, o CENOMAR ha buhatan han PSA kay mayda nira special lane. An waray liwat national ID o ePhilID kinahanglan mag-pa-online appointment ha ira buhatan san-o makakuha han mga dokumento.

Para han kadugangan nga impormasyon, bisitaha la an ira official website, www.philsys.gov.ph.

#CIOUpdates

#PhilSysID

(Via HJ ROCA, with a report from EA Lagahit)