TACLOBAN CITY (Sept. 16, 2021) – Human na ini nga building- ngan ha hitsura hini, mahililipatan nga usa ini nga mini hotel dara hiton kamaanyag hiton kahimo hini.

Pero sugad hiton aada nakadukot nga karatola, usa ini nga Health Center nga gintawag “TACLOBAN NORTH INTEGRATED HEALTH & SOCIAL SERVICES”.

Ini an magseserbe nga Health Center ha mga Barangay ha Norte Tacloban kun diin nahimumutang an mga pabahay han mga Yolanda survivors.

Usa nga proyekto nga nahimo han City Government ha ilarom han liderato ni Mayor Alfred S. Romualdez ha pakig binuligay han DPWH, Tingog Partylist Rep. Yedda Marie K. Romualdez ngan Leyte 1st District Cong. Ferdinand Martin Romualdez.

Ha pamakiana han News Team ngadto han pira nga mga personahes han temporaryo nga Health Center (sapit la han bag-o nga building), nahibaroan nga nagkaada na hin pauna nga turnover hini nga pasilidad- kundi waray pa pormal nga turn-over mahitungod nga may-ada pa mga talagudti nga bubuhaton san-o ig talaan an formal turnover.

Nahimumutang ini nga “TACLOBAN NORTH INTEGRATED HEALTH & SOCIAL SERVICES” building ha entrada han GMA Kapuso Village ngan UN Habitat pabahay ha Brgy. 106 Sto. Niño ha Norte Tacloban.

M. Padernos/CIO