Tacloban City- Padayon pa nga ginpaplantsa ipinaagi hin mga public hearings an iginduduso nga balaudnon ha siyudad han Tacloban bahin han pagpa minus-minus (reduce) han pag gamit han mga plastic o cellophane ngan styrofoams ha ngatanan nga mga magneregosyo.

Sumala kan Konsehala Imee Delgado-Grafil, Chairperson Committee On Environmental Protection and Waste Management, dida pa ini han 2017 natikangan nga pagduso hini nga proposed ordinance, kundi mahitungod hin dirodilain la nga rason- sugad han mga sumunod nga mga tuig diin naigo an nasud han Covid 19 pandemic nga nagdurot han paghiroydoy han ekonomiya, naipapinid anay an paghimangraw parte hini.

Sanglit yana nga 2023 nga hinayhinay na nga nabalik an kamabaskog han ekonomiya, balik na an mga public hearings san-o ini iplastar ha bug-os nga konseho para hin mas hugot pa nga paghimayhimay han “Proposed Ordinance Regulating The Use Of Plastic And Utilization Of Polystyrene As Packaging Materials In The City Of Tacloban, And Prescribing Penalties For Violations Thereof”

March 20, 2023, otro nagdumara hin public hearing ha CEO Gym nga gin-atenderan han mga nagtatag-iya o di man ngani tinaglawas han mga mag neregosyo ha siyudad.

Dida hini nga public hearing pinamatian an opinion han kada tagsa- kun diin an ira mga iginpahungaw nga mga opinyon in magigin kaparte han mga kunsiderasyon han Committee ha pagplastar han penal nga unod hini nga balaudnon.

mmp/CIO

jballo/knapala/CIO