Upod na hiton budget sunod nga tuig an panbutang hin mga street lights ha mga pabahay ha Norte Tacloban para mas mamintinar an peace and order o kamurayaw dida hini nga mga lugar.

Ini an ginbul-iwan nga pahayag ni Mayor Alfred S. Romualdez, atubangan han mga taga North Hill Arbours 1 & 2 ha Norte Tacloban nga natagan na han mga titulo han tuna nga gintitindogan han ira balay ha pabahay.

Dida hini nga pahayag han alkalde, lakip niya nga ginhangyo an mga molupyo nga kun mamay-ada na hini nga mga streetlights- diri gud mag illegal tapping tikang dida han mga streetlights kay magkakaproblema an systema han siyudad ngan han LEYECO II nga makaka apekto han operasyon hini.

Ha ikaduha ka adalw nga aktibidad, kaupod ni Mayor Romualdez ha panhatag han 536 nga mga titulo han tuna ha mga benepisaryo han Yolanda Housing hira City Councilors Elvira Galapon-Casal, Aimee Delgado-Grafil, Leo Bahin, ngan mga taga NHA ha panguna ni NHA Regional Manager, Engr. Constancio Antiniero.

M. Padernos/CIO